لو يسمح وقتك
الشاعر / عطية شواش
رساله الي صديقي المناضل (فؤاد سالم)
(اوجعتني حين قلت لي لم أعد احتمل الاعتقال)
لو يسمح وقتك بلغني
يسمح يعني؟
بس بشرط تقول لي صراحه
مش تخدعني
احنا بنفهم حاجه ف حاجه؟
ولا اللعبه مش محتاجه حد
بيفهم
طيب يعني ...لو صدعني
إن الناس مش قادرة تعيط
م الجرح وهي بتتخيط
يعني لو كزت في سنانها
والابره بتدخل مصرانها
تبقي بطوله؟
لما الغوله تاخد بالها
وبتاكل واحد في عيالها
تبقي بطوله؟
لو إيدك صبحت مشلوله
وانت الحالم
مع انك يافؤاد في الغالب
كنت حبيبي مذكر سالم
ضد الوقت الكسر السالب
او في الغالب
كنا النص اللي بيتعايق
وانت القالب
طيب يعني ...لو يوجعني
إن الشمس بتيجي يمين
والخمسه في سته بتسعين
تبقي رياضه؟
او نتغاضي عن جدول يضرب
ارقامه
عن واحد بيقول اسلامك
حتما قطعا غير إسلامه
تبقي بطوله؟
نص الفوله مش زي النص
التاني
نص بيشرب كل الميه ونص
يعاني
نص رجوله
يادي الحوسه
حية موسي
أكلت كل الحيات
مبقاشي غير الخصيان
فاضطر ف زمن الأوباش
يعمل تعبان
قال ايه بيغير جلده
أو عبا السم في كيس
أو علبه صفيح
ويقول لك بنعارض
ويطلع ريح
بالذمه مش علق صريح؟
فاكر يافؤاد؟
واحد من زملاتك
استنهز آخر فرصه وأصبح
دكتور
في الأدب العام
مسألتش خدها ازاي
او خدها بكام
لما قابلته بمحض الصدفه
سلم بفتور
وكأنه في سجن الحضره
هو المأمور
واتحجج بالضلمه
مع انه سبحان الواهب
القوضه بتشعلل نور
هزيت له دماغي بكل غرور
طالب تليفوني
اديته رقم الباسبور
ماكتبهوش
حافظ كل الارقام
من اول تليفون العمده
لتليفون الأمن العام
واحد تاني ياعم فؤاد
معرفش ازاي بقا في الاكتاف
مع اني من اول لحظه
كنت مسميه الهتاف
(عاشت مصر ومصر تعيش)
مع انه ابن القحبه كان
عنده مرتب ثابت
م الشرطه وم الجيش
ونذور الأسياد
يتحول وف لحظه
من ثوري لقواد
موضوع إستعداد
كان صاحب خطوه وصاحب سطوه
وصاحب صاحبه
طب ايه رأيك كان في ميدان
التحرير
ماسك ورقة بفره بيكتب
تقرير
عن واحد صاحبه اخد الطلقه
وروحه طلعت فوق
قام كاتب كان الجاني بجسمه
المخروق
حدف العسكر بالمولوتوف
مع الراجل كان شاعر بيزقل
في حروف
قال لك بردو الحرف بيدخل
في الخوذه ويوجع
لو كان مشطوف
عن بنت بتشرب شاي وسجاره
وفطيره في كيس
مسكاها في ايدها وبتطالب...عزل
رئيس
قال لك بتمارس جوه الخيمه
وبتتعاطي حشيش
مع كل النسوان
لكن بعديها بيوم ربي في
دقنه
وأصبح م الاخوان
شفت ياعم فؤاد
موضوع استعداد
المشهد كله بعلم المخرج
والإعداد
الكل بيقبض بالعداد
واحد تاني عارفه كويس
راهن علي نص السلم
شاطر جدا لو يتكلم في
الوطنيه
كان أحدث ظاهره صوتيه
دلوقتي ماشاء ألله
بيعرص مخلص ومعاه
كل فلوس الصبحيه
بعد ماسلم روحه هديه في
لعب الطاوله
مع صاحبه التاني ف أمن
الدوله
واحد تاني أصبح سمسار
بيتاجر في الأرض البور
وجواز المسيار
فاتح مكتب مش منظور
لكن سبحان العاطي
بيعبي فلوسه ف حنطور
بس شهاده زعيم
ناشف جدا في حواره
زي الكفت وزي الريم
متخصص جدا في الأخضر
لو كان برسيم
نص معارضه ونص بهيم
بيناضل في الوقت الفاضي
متشكر جدا ياسليم
كله اتسكن
كله اتمكن
واحنا الهبل اللي رفضنا
نعمل لعيالنا فلوس
واحنا الهبل اللي عادونا
زي الفيروس
وطلعنا من الملعب بلبوص
بس ازاي يافؤاد حتحقق مبدأ
وانت جاسوس؟
ادي الدنيا ياعم فؤاد
علق صريح
واحنا كبرنا بجد صحيح
ممكن نركن م النهجان
لكن عمر السجن ماخوف
غير السجان
مره تلاقينا في السما
ملاكين
مره تلاقينا ع الشجر فرعين
دور علينا في الوطن ياسمين
واتبع ريحتنا في الجدور
الطين
واقرا ما بين شعرنا
طب فسر المعني
يابت يام المريله بمبي
ذنب المحب الوجع
وانتي كمان ذنبي
0 تعليقات