ام عمار !!!!

ام عمار !!!!

حسين عادل

ومن منا لايعرف أم عمار اقصد المرابطين في ساحة التحرير وسط العاصمة بغداد 

منذ اندلاع الانتفاضة ........

تعال وياي حتى تعرف أم عمار ...

أنا : السلام عليكم أم عمار

أم عمار : عليكم السلام ورحمة الله وبركاته

أنا : شلونج يمه

أم عمار : الله يحفظك أبو علي (طبعاً تعرفني لان يوميه أجي يمها اشرب جاي واكعد يمها )

أنا : أم عمار أريد اسولف وياج حتى انشر قصتج بالفيس بوك

أم عمار : عادي يمه أتفضل

أنا : شكد صارلج بالتحرير

أم عمار : يايمه من 11/1 أني بالتحرير وأنت احسب

أنا : يعني صارلج 53 يوم

أم عمار : أي صحيح جنت يم نصب التحرير وبعدها استقريت هنا ( قرب النفق من جهة الخلاني )

أنا : اشعندج هنا ؟؟؟؟

أم عمار : والله يايمه أني عمري 60 سنة شباقي بعمري بس يايمه ثق بالله طالعة على مود هذه الشباب خطية تركت دوامي واجيت للتحرير

أنا : بيش الساعة تجين لهنا

أم عمار : والله يا أبو علي اغلب الأوقات أصلي الظهر وأجي

أنا : ولوين تبقين ؟؟

أم عمار : مو سوه مرات ب ٨ ومرات ب ٩ ومرات ب ١٠ بس الأغلب أتأخر لان أبقى أنظف الموكب وألم الغراض واطلع

أنا : الله ينطيج الصحة والعافية سمعت عندج اخو معتقل صدك ؟؟

أم عمار : أي يمه صحيح اعتقلوا بالأحرار وحركوا التكتك مالته وكل أسبوع أنزوره بمطار بغداد

أنا : الله يفرج عنه وينطيج الصبر ، يمه شنو رأيج بالمظاهرات

أم عمار : إن شاء الله إلي أنريده يصير بس يحتاج وقت ولازم نصبر وما انمل لان الحكومة اتراهن على الوقت

أنا : والله يايمه أريد من الله يحفظج وينطيج الصحة والعافية وبطول بعمرج بحق محمد وال محمد .