شريف صالح يكتب ملاحظات عن
جايزة ساويرس
كتب القاص الدكتور شريف صالح ملاحظات حول جايزة ساويرس
جاء
فيها:
معلهش
مضطر أقول ملاحظات على جايزة ساويرس:
1. المنطق بتاع يعني أنت لو "اترشحت أو فزت"
كنت هاتتكلم.. قايم على مغالطة منطقية ساذجة.. بتفترض أنه اللي بيحكمنا في تقييم "نشاط
عام" هو "مصالحنا الشخصية". وبينقل الملاحظة العامة للتعريض بذات
المُلاحظ. أيوة يا سيدي أنا عن نفسي كنت مرشح لجايزة اسمها الملتقى وكتبت ملاحظاتي
في بوست عادي جدا.. وقلت بعضها لمدير الجايزة نفسه.. وكتبت عنها حتى من قبل ما
اترشح لها.. لأنه من الأساس دوافعي لقول الملاحظات هو مصلحة عامة.. مش ذاتية.. فياريت
إذا حد بيدير أموره بالمنطق المملوكي بتاع "فيها لأخفيها" لا يسقط دا
على كل حد بيقول ملاحظة.
2.
ثانيا حكاية "تجريح الفايزين" وهم زملاء وأصدقاء محترمين ومبدعين وأفضل
مني.. هارجع لنقطة قلتها مليون مرة.. أي مبدع أو مثقف يفوز بأي جايزة فهو يستحق.. ودا
أقل من جهده.. ولما بنبارك لهم دا مش نفاق.. ولما ننتقد الجايزة ذاتها دا مش طعن
في استحقاقهم.. وهاضرب مثل بكتاب "سيرة الرواية المحرمة" أنا قلت بوضوح
إني مش شايف أنه "الكتاب نقد أدبي" لا "تنظير ولا تطبيق".. ومحتمل
جدا تكون وجهة نظري غلط أساسا.. وطرحت الموضوع أمام أساتذة النقد الأدبي.. وإذا
كانوا يقبلو الكتاب زي ما هو كدا كرسالة دكتوراه مثلا في أقسامهم.. وقلت في نفس
البوست أنه الكتاب جدير بالاحتفاء وأنا نفسي كتبت عنه وفرحان به.. وطرحت اقتراح
أنه الشرط نفسه يتوسع ويكون جائزة الدارسات الأدبية والثقافية. هل في كلامي كدا
تجريح في جدارة الكتاب أو استحقاق الفائز؟!!
3. كمان الكلام بتاع أنه الأعمال الفايزة جيدة
وبالتالي علينا نفرح ونهيص لها.. منطق معقول طبعا.. بس دا مش دور الجايزة أنها
تلفت نظري للأعمال الجيدة بس.. دا غير أنه في عشرات الأعمال الجيدة كمان ما بتظهرش..
في ظل التكريس الواضح والفاضح لأسماء متكررة.
4.
نيجي كمان لطبيعة اختيار لجان التحكيم وهاضرب مثل بآخر لجنة في القصة والرواية: هدى
أباظة (مقرر)، هبة العبادى، محمد توفيق، كمال مغيث، محمود الوردانى. مين من
الأسماء دي له حضور مهم ككاتب أو ناقد للقصة والرواية؟!!!!! ياريت اللي يعرف
الأسماء ينورني علشان أعرف أهليتهم في التقييم.. اللي أعرفه منهم الروائي محمود
الورداني.. ودا هاينقلني لسؤال تاني الأستاذ الورداني حكم واترشح وفاز بالجايزة كم
مرة؟ أعتقد أنه من الأسماء اللي حاجزة مقعد سنوي فيها. مع كل الاحترام لشخصه
الكريم.
5.
كمان من الملاحظ على ساويرس التوجه المضمر مش بس لكتاب بعينهم.. كمان لدور نشر
بعينها.. وشبه الغياب التام لكتاب خارج القاهرة.. ربما باستثناء اسم أو اسمين كل
سنة.. فياريت تنشر احصاءات الفايزين وتكذب الكلام دا.. فهل لا يوجد مبدعين مصريين
متميزين خارج القاهرة؟
6.
يعني أنت كدا مش عاجبك الجايزة ومش هاتترشح لها؟ لا بالعكس أي جايزة مهمة للأدب في
الوضع البائس اللي إحنا فيه.. والملاحظات مش معناه أنه مش عجباني الجايزة.. وحقي
وحق كل كاتب يترشح لها.. وحق كل كاتب كمان يطرح ملاحظات.. وأي إدارة محترمة لأي
جايزة لازم تكون حريصة على السماع للملاحظات.. اللي ممكن تكون بسيطة جدا.. وتؤدي
لمزيد من الشفافية والعدالة.
......................
الخلاصة
يعني لما بكتب بوست بكتبه تحريا للحق مش مجاملة لأصدقاء الخسرانين.. ولا حقدا ضد
أصدقائي الفايزين.. ومش مطلوب أن فلوس الجوايز تتحول لسيف يمنع النقاش بشأنها. واللي
بقوله على ساويرس ماعنديش مشكلة أقوله على أي جايزة تاني شاركت أو مشاركتش فيها.. زي
البوكر اللي كتبت فيها مقالات مع إني عمري ما بعت لها أي كتاب لي
0 تعليقات