"إبنهس" وتجربة المبادرة الأهلية

رسالة النيل

فى محافظة المنوفية وتحديداً فى مركز "قويسنا"، وتحديداً أكتر فى قرية "إبنهس"، وبعد إصابة أحد أهالي القرية بـ فيروس كورونا، ووفاته أهل البلد عملوا تصرف إيجابي عظيم من منطلق إحساسهم بدورهم الوطني فى الظروف دي..

عملوا عزل كامل للقرية بشكل مجتمعي بدون أى تدخل رسمي.. قرروا يشغلوا أصحاب التكاتك والموتوسيكلات فى توصيل الطلبات.. الموضوع ساعد فى تنظيمه شباب القرية المتعلمين، وهما اللى نسقوا مع أصحاب التكاتك والموتوسيكلات والعربيات السوزوكي وما بين أهل البلد.. عملوا ورق عليه أرقام تليفونات الناس اللى وافقوا يشاركوا فى الموضوع ده ووزعوه على كل أهل القرية وعلى السوشيال ميديا..

لو عايز تشتري حاجة أو توصل حاجة أو حد خليك فى بيتك وإتصل بواحد من اللى أرقامهم فى الصورة وهيجيلك لحد عندك.. الغرض إنهم يحاولوا يقللوا قدر الإمكان خروج الناس من البيوت..

الوعي والإدراك فى المواطن المصري حاجة أثبتتها التجربة، وكل ما نبحث أكتر هنلاقي نماذج عظيمة بتفكر وبتشغل دماغها بشكل إيجابي.. نتمني نشوف التجربة دي فى كتير من قري مصر، وزي ما دايماً بنقول إن أول خطوات مواجهة كورونا هي الإلتزام بالتدابير اللى قالت عليها وزارة الصحة وأولها التباعد الاجتماعي، والمحافظة على النظافة الشخصية.. ربنا يحفظ مصر وأهلها.