معركة العزة

 

 

 

 

 

 

بقلم /احمد هارون

 

نقلا عن شاهد عيان

 

 

كواليس مثيره في أكبر مواجهه تمت بين الشرطة والجيش المصري ضد داعش في رمضان٢٠١٥م.

 

 

يوم 1/7/2015 الموافق 14 رمضان وقتما كنا فى كمين الجورة وكان معنا قادر هارون وآخرين ونفذنا عملية كبيرة وفى الصباح ضرب علينا دانة هاوون ووقع بجوار الكمين وصابت زوجه الحج '' علي خلف'' كانت قاعدة في عشتها جنب الكمين طلعنا عليها بسرعة وعملنا لها الإسعافات الأولية ورجعنا علي إشارة من قادر '' هارون'' وجمع قوة الكمين كلها والدعم الموجود في الكمين ولقيناه بيلبس هدومه وبيقول اجهزو بسرعه الكماين بتاعتنا كلها انضربت جهزنا M60 وM113 واتحركنا اتجاه كمين الوحشي وبعد ماعدينا الوحشي جت اشاره لهارون انه يرجع لان التكفيريين ضربو الاكمنه ولغمو الطرق كلها والطيران بدا يدخل ولازم نرجع عشان الطيران مايخلطش بينا وبين الدواعش.

 

 

قادر هارون قفل الجهاز وكملنا في الطريق وفجاه ظهرت طيارة اباتشي فوق مننا مباشرة واحنا مكملين بعد كمين الوحشي بكيلو ونص قريب من محطه الغاز في عشه عليها صاج طلع منها صاروخ وصاب الطياره اللي كانت بتامنا وقفنا والطيارة رجعت باتجاه العريش واحنا ضربنا العشه بدانة دبابة دمرناها وكملنا في طريقنا ، قادر هارون لما فتح الجهاز لقينا اشارة ان الدواعش سيطرو علي كمين السدره تماما وكل قوه الكمين استشهدت ولما طلعت علي الدبابة لقيت ان لسه العساكر في الدور التاني بيتعاملوا وباينين جدا والدواعش تحت المبني باينين بالمنظار هما كمان ، عملت التفاف انا والشهيد النقيب جوده ومعانا 4 عساكر ودخلنا في الشجر عشان نلتف علي الدواعش ونبقي في ضهرهم واحنا داخلين بكل حذر لقينا شجره خوخ مكسوره في الأرض وتكفيري نايم تحتها وعاملها تمويه ومعاه مدفع موازي معدلين فيه وهو بيتعامل بيه دخلت عليه وصفيته بخزنه كامله 36 كان معايا عسكري صعيدي من المنيا شهرته( زبلايط ) اجدع عسكري شفته في حياتي شال سلاحه وعلقه في ضهره وخد المدفع وقال يلا عليهم وجنبي النقيب جوده بيقول اللهم ارزقني الشهادة وبدانا ننطق الشهادة ونتحرك باتجاه الكمين اول حاجه قابلتنا كروز عليها تكفيريين وتمويه بفروع شجر خوخ النقيب جوده اتقدم وواجهها بصدره وهو بيقول الله اكبر و ضربها بدانه RBG لما الضربة طيرت الصندوق بتاع العربيه بالكلاب اللي فيه وبدانا نتعامل خلصنا ع السواق واللي جنبه واتقدمنا واحنا داخلينا لقينا مصفحة حديد ف حديد داخلة هجوم علينا واتعاملنا عليها بالمتعدد ولا كاننا بنضرب مافيش ضرب ماثر فيها ظهر فجأه كالمارد او الجن من ورانا المقدم هارون بالضبط كافلام الاكشن الامريكيه واتقدم باتجاهها وضربها ب ش . ف وانفجرت في الحال انفجار مروع كبير.

 

 

 

وبدا صوتنا يعلي بالتكبير الله اكبر والحمد لله وسرت علي اجهزه الجيش والشرطه يومها نغمه " العزة لله والنصر لهارون " دخلنا الكمين لقينا 4 عساكر بس احياء بيشتبكو والباقي مصابين وشهدا وهارون قالنا اثبتو انتو هنا وسيطرو علي الكمين وانا هتحرك للكمين اللي بعده والنقيب جوده هيفضل معاكم ، واتحرك المقدم هارون وطلعت امشط حرم الكمين وبعد ماطلعت من الدشمه بمسافه 30 متر بالظبط لقيت مكان لودر ضارب سكينه في الارض وعامل زي الساتر كدا ولقيت الشهيد المقدم درديري اقسم بالله اقسم بالله اقسم بالله وشه شبه القمر ابيض ومنور وعليه ابتسامة اول مرة اشوفها في حياتي وصامد في موقعه صمود الجبل وجنبه اكتر من 20 خزنه سلاح الي اغلبهم فارغ وقدامه مباشر 7 جثث للكلاب مخلص عليهم ، المقدم درديري مات بطل لما الاشتباك بدا نزل درديري من الدشمه وعمل في الكلاب طريق وقتل منهم عدد واتمركز في المكان دا وبدا يصد تقدمهم وشهادة حق قدام ربنا الكلاب ماقدروش يدخلو الكمين الا لما استشهد المقدم درديري ، كنا في الوقت دا 20 فرد وعملنا اشارة لظابط احتياط دكر كان في كمين زلزال 6 اسمه ملازم سامح واتحرك علينا مباشره ومعاه عدد 2 اليه M113 و 12 عسكري واتقسمنا نصين ملازم سامح والمقدم هارون طلعو علي كمين ابو رفاعي دعم للظابط ملازم ادهم واحنا فرضنا سيطرة علي كمين السدره وخدنا سلاح الدواعش واجهزتهم وهما لسه بيكلمو بعض علي الاجهزه وانا ماسك الجهاز بتاعهم في ايدي سمعتهم بينادو علي بعض يا 27 يا 27 قبل قبل انا في وجهك بصيت لجوده وقلتله كدا هيطلعو في اتجاه '' التومه '' خدنا العسكري زبلايط والشهيد النقيب جوده وسلاحنا كله ثقيل وكل واحد الالي بتاعه علي ضهره ولقينا 6 كلاب منهم وعربيه كروز واقفين بالظبط علي مفارق '' نجد '' غرب كمين السدرة ، نقيب جوده الله يرحمه لما شافهم قال محدش يضرب دول بتوعي انا ومنعته يتقدم.. زقني واتقدم 10 متر لوحده وفتح عليهم النار لما خلاهم بيرقصو زي اللي ماسكهم سلك كهربا طلعنا عليهم وخدنا اجهزتهم وسلاحهم وصورناهم فيديو وصور ورجعنا للكمين واول ماوصلنا سمعنا قادر هارون بيتاعمل بالثقيل مع الدواعش اللي محاصرين الظابط ادهم وكمين ابو رفاعي وكانت اصوات رهيبه ومجزره حقيقه بكل ما تحمله الكلمه من معني وضرب قوي جدا حرفيا مجزرة لمده نص ساعه بين هارون والدواعش وانا بنادي ع هارون اجب ياقادر هارون اجب ومفيش رد.

 

افتكرنا هارون استشهد ! وفي الاخر رد عليا مندوب مدني بطل ( ح . ع ) الله اكبر الله .. دمرنا عربيتين وخلصنا عليهم والباقي هرب للغرب وشفنا الطيران الحربي ببطاردهم ويستهدفهم بعيونا.

 

 

 

بعد نص ساعه لقيت قادر هارون بيدينا التمام بثبات انفعالي رهيب لا يتناسب مع المجزره !! اعصابه كانت ثلاجه ويقول ان تم السيطرة ورجع المقدم هارون جايب M113 فيها الشهدا والمصابين وM113 ثاني فيها معدات وأسلحه الدواعش وأول ما المقدم هارون وصلنا في الكمين قال عايز m113 تفضي بسرعه لازم ارجع اجيب جثث الكلاب دي وحاولت اقنعه قال والله ماهنام غير ماجيب جثثهم وفعلا رجعنا علي كمين ابو رفاعي رفعنا جثث الكلاب اللي سليم منهم والمتقطع خالص صورناه فيديو وصور واحنا بنشيل الجثث.

 

 

 

قادر هارون بيسالني انت شفت هدوم الدواعش والزي دا فين قبل كدا قلتله دا بتاع قوات UN القديم رجعنا لجوده وكنا عايزين نخلي المصابين والشهداء  للشيخ زويد بس الاوامر جت من عدمه لان الطريق مقفول وفيه اشتباكات وكل الطريق متلغم وخدنا تعليمات بالإخلاء لمطار الجوره.