ايه البلد دى..؟!!

 

 

وائل عادل

 

 

من شوية كنت بقرأ موضوع عن إزاى الدول العربية بتحتفل بشهر رمضان.. قرأت عن السعودية والامارات والاردن والعراق وغيرهم الموضوع شاغلنى من امبارح لما كنت انا وعامر فى الخيامية.. إعلان (رمضان فى مصر حاجة تانيه والسر فى التفاصيل) الفكرة بالنسبالى هى (التفاصيل) دى..!! تعالوا بقى اقولكم شوية تفاصيل صغيرة من امبارح وانا فعلا بفكر اروح اصورها فيديو..!!

 

اى حد منكم رايح الخيامية يتفرج على زينة رمضان هو طبعا أكيد ح يكون مبسوط من الحالة بشكل عام.. المكان كمساحة فهو مش كبير خالص لكن زحمة طبعا.. بس المعرفة بتزود المتعة..!!

 

انت فى شارع واحد بس.. فى الشارع ده ح تشوف تاريخ بينطق قدامك..!! فاطميين على مماليك على سجن وبقى جامع على بوابه المفروض انها للمدنيين لكن ياما اتشنق عليها ناس منهم رسل التتار والسلطان طومان باى.. ده غير حكاية اسم البوابة نفسه (زويلة) وليه بعد كده المصريين (الشعبيين) سموها بوابة المتولى واتعمل مسلسل بالإسم ده..!! ح تشوف زينة مفروشة وراها جامع صاحبه بناه علشان يدفن فيها الرأس الشريف لسيدنا الحسين علشان لما هو نفسه يموت يندفن جنبها..!! لكن ماحصلش ومع ذلك الجامع ده فيه خشبه متعلقه كبرواز على الحيطه.. بس دى مش اى خشبه..!! اللى بيقال عن الخشبة دى إن هى اللى تم عليها غسل الرأس الشريف..!!

 

على فكرة كل اللى بتكلم عنه ده ماكملش حتى شارع اقسم بالله

انت اصلا لو اديت ضهرك للبوابة ووشك للخيامية وفضلت ماشى هتلاقى نفسك بتقابل ٣ عواصم لمصر الفسطاط والقطائع والعسكر..!! ولو دخلت فى الشوارع والحوارى والاختصارات بقى فممكن تروح السيدة زينب او السيدة نفيسة او حتى السيدة عائشة او شارع الاشراف.. ولو دخلت من البوابة وفضلت ماشى لحد ماتوصل لقبة الغورى هتلاقى يمينك الأزهر الشريف وفى وشك يمين هتلاقى مسجد سيدنا الحسين وفى وشك برضو بس شمال هتلاقى شارع المعز لو دخلته هتقابل كمية آثار إسلامية هتتعب من كتر عدها.. ولو كملت الشارع لأخره هتلاقى بوابتين النصر والفتوح وقبلهم جامع الحاكم بأمر الله تخرج تلاقى قرافه مدفون فيها شوية حلوين من عظماء التاريخ .

 

ولو انت لسه قدام باب زويله ودخلت يمين (الدرب الاحمر) هتلاقى تاريخ ومزارات وحكايات .. ولو دخلت شمال بقى للاخر هتلاقى متحف الفن الاسلامى قدام مديرية الامن على طول اللى لازم تدخل تسلم نفسك وتطلب انهم يعدموك كمان لو فاكر ان مصر دى زيها زى اى مكان تانى كده😂😂

 

ده انا اصلا لما فكرت اصور مع ان المساحة صغيرة والموضوع سهل لقيت نفس مش عارف احكى عن ايه ولا ايه ولا ايه ولا ايه وسعوا شوية كده ولا ايه ولا ايه ولا ايه😂😂😂

 

عموما البوست ده الغرض منه ان اى حد منكم لو راح علشان يشوف او يشترى زينه وفوانيس وكده يبقى عارف انه مش فى مجرد مكان بيبيع زينة.. انتم ماشيين على تاريخ دول عظمى تتمنى ولو ربعه حتى يكون عندها

 

مش عارف اقولكم ان المنطقة اللى مليانة زينه وزحمة وجمال دى كانت مدافن اصلا فى يوم من الايام ولا ح تتخضوا😂😂

 

الغريب يا اخى ان رغم ارتفاع الاسعار والشكوى الى آخره والحرب والكلام اللطيف ده إلا ان المصريين عايشين حياتهم عادى جدا وبيشتروا والله وبيحتفلوا والحمد لله دى نعمة كبيرة والله بجد

حاجه اخيرة بقى : هل فيه دولة تانيه تعرفوها المسيحيين فيها بيحتفلوا مع المسلمين فيها بشهر رمضان ويشتروا زينه وفوانيس وياميش ويفطروا صايمين كمان..؟!!

 

هو السر فى التفاصيل بس تفاصيلنا دى عايزه كتب مش مجرد بوست..

 

أحنا مصر وربنا يسهل واعرف اصور