أنت ..... حار
المهندس الشاعر : عطية شواش
أنت ..........حار
مش عارف رأيك أيه
في اتناشر ألف معارض
بذر الكتان
واتناشر ألف معارض
فوانيس رمضان
فيفكر. .....
طبعا بعد جنابك
مايوافق
فيموت غرقان
أو من فوق البرج
الرمز
للألف الممدودة علي
نهر النيل
وجزيرة الورد
والفيلم الساقط من أول
عرض
أيدك والأرض
من ديه عيال
طب يعمل إيه؟
كان لازم تأكل بيتزا
وتشرب كوكتيل
أو بيرة في كنز
أو تركب مرسيدس بنز
بتموت نفسك ليه ؟
مش عجبك أهرام الجيزة
وضحكة موناليزا
وأحمد موسي
وعمرو أديب؟
مش عجبك ماري منيب
وبشارة واكيم
مش عجبك فتحة مي
سليم
مش عجبك عبد الفتاح
القصري
وسميه المصري
وقناة التت؟
مش عجبك صوت الست
(وقف الخلق)
في دار الشفا
أبو الوفا أبو الوفا
مش لاقي واحد معرفه
يدي له حقنة انسولين
فتلاقي كل الميتين
بينزفوا سكر ....ومعسلين
بتموت نفسك ليه؟
الله يخليك
مش عجبك لو تتعالج
بالتدليك
أو أن تكاتك مصر
بحالها
بتركن ليك ؟
مش عجبك تبقي زرار
ويدوسوا عليك
فتطلع قش الرز
وريش الوز
وتملا بنوك
مش عجبك تبقي سلوك
بتوصل بين الكوبري
وشركة we
مش عجبك سبعه جنيه ؟
بين المترو وباب
اللوق
مش عجبك سعر السوق
ممعكش فلوس؟
طب امشي شويه في قلب
الدقي
أو شارع قصر النيل
أو خش عماد الدين
حتلاقي اللبس رخيص
بتراب الماس
حتلاقي البتارين
واقفه بتتفرج ع
الناس
حتلاقي لباس
مش واصل الف جنيه
بتموت نفسك ليه؟
وشرابك مقطوع
بيدخل طوب
وصباعك زانق أخوه
في الكوتش المضروب
والبنت اللي انت
واعدها
بعشه في قلب مدينتي
لابسه جوانتي
من فروة كلب
بتبص لعيل راكب
خنزيره
من غش الجبنه بمسحوق
السراميك
البدله الشيك
بتلمس ويا البنت
واللمس صريح
فرمت لك دبله صفيح
مع عود الورد
المتكرمش
من زحمة خط المرج
اطلع ع البرج
واتفرج ع الشبابيك
حتلاقي فلوس النفط
بتنزل فينا ...فنيك
ح تموت نفسك ليه؟
ماتخليك
لسه المستقبل متعلق
في الاباليك
لسه المماليك
حتحاصر تاني القلعة
وتنزل سليمان الحلبي
ويحاكم كل المصريين
اللي معاهم أيفون
خطين
نازلين تصوير
وأنت بترمي وراك
قدام
زي الافلام
ورحلت
بس يا حلو إياك
ماتكون
عورت الأسفلت
حتدخل نفسك سين او
جيم
ويحاسبك ملاكين من
قسم الموسكي
وتروح النار
او ييجي النائب
ويعاين
المجني عليه
التلتوار
وبيكتب في المحضر
الواد الجي
بيموت نفسه
مع انه مش من أهل
الحي
بيموت نفسه في الحي
الهاي
فيزيحك ع الزاويه الحمرا
ويكتب ...اكله
الترماي
بتموت نفسك ليه ؟
مع ان الإعلان بيقول
لك
تشرب ايه ؟
اشرب شاي
0 تعليقات