جهااااااااد وسلامه

جهااااااااد وسلامه

عطية شواش

ياسي عنتر يابن خالتي

أنت مالك بالنظام

هو متجوز حماتك

ولا كان خال المدام

ولا زرك عند بابا

ولا وزك ع الخرابه

ولا أخدك في الحرام

ياسي عنتر يابن خالتي

أنت راجل مش تمام

..........

ياسي عنتر يابن خالتي

أنت مالك بالحكومة

هي كانت ضرة أمك

ولا كت رقعاك بشومه

هي داخله ولا طالعه

اقرأ في كتاب المطالعة

بابا مش محتاج عزومه

..........

ياسي عنتر يابن خالتي

أنت مش شفت البيان

إن فتح البق عيبه

وانه بيودي اللومان

وانه حيحل المواشي

وانه حيغرق غيطان

وان لو علقت يافطة

تبقي وسخت الحيطان

تبقي غيرت الطبيعة

يعني ميلت الميزان

..........

ياسي عنتر يابن خالتي

أنت مش دايمن تقول

ابن عرص أبو الفصاده

بنت كلب أم الخلول ؟

أقعد اشتم لما تفطس

ولا تشرق ولا تعطس

حول الألفاظ خيول

تجري في سباق القوالة

إستحاله ...

إست حاله

تبقي في سوق الدلالة

مش حترجع غير بفول

فول علينا بكره تاني

بدل الألغاز معاني

إستفندي .... برتقاني

والسنة سميها حول

إحود المعني شويه

واقلب الهامش قضيه

نرزعك أول بونيه

يبقي دمك اسمه بول

قول علي السكر حداقه

واكتبه جوه البطاقة

تبقي تفلت م العقوبة

تبقي يامذنب براءة

..........

ياسي عنتر يابن خالتي

أنت مال أهلك ومالنا

كنا شركا في جاموسه

ولا بتنقط عيالنا

ولا لحمه من عقيقتك

عمرها زارت حللنا

سيبنا ... سيبا

أنت جي بكيس جوافة

ولا فكرت تناسبنا

ولا حشيت للبهايم

مره من غير ماتحاسبنا

جي بتسم في بدنا

كل حبه ياسي عنتر

جي بتنط في ودانا ؟

..........

ياسي عنتر يابن خالتي

أنت حادف ليه شمال

أنت تعرف معني دوله

ولا فاهم إيه قنال

ولا راجل اقتصادي

ولا ساكن في المعادي

ولا من أهل النضال

..........

ياسي عنتر يابن خالتي

أنت مالك بالعزيز

كنت تلعب جنبه كوره

ولا نطة لانجليز

ولا في سباق الضواحي

ولا في طهور المعيز

ياسي عنتر يابن خالتي

أنت راجل مش لذيذ

..........

ياسي عنتر يابن خالتي

أنت مالك بالوزارة

هي كت جوه الزريبة

وأنت راكب ع الحماره

ولا جريت م العساكر

لما مسكتكوا بسيجاره

أنت عايز منها حاجه

ما أنت عايش ع المحارة

..........

ياسي عنتر يابن خالتي

أنت مالك بالأمانة

مجلس الشعب اللي ناقش

اللبن في الأجزخاته

مجلس الشعب اللي وافق

تتلغي خانة الديانة

مجلس الشعب اللي رافق

كل أطفال الحضانة

مجلس الشعب اللي شايف

إننا نوفر عشانا

ياحبيبي الدنيا خربت

وأنت مش واخد خوانه

..........

ياسي عنتر يابن خالتي

أنت مالك بالقضايا

أنت كنت وكيل نيابة

ولا في أيديك العصايا

ولا قاعد ع المنصة

والعدالة الناجزه طسه

مصمصوها مصه مصه

كل حاجه فيها حاشره

أنت مابتسمعش ناشره

دا أنت لو بصيت لقاضي

بصتك جنحه مباشره

..........

ياسي عنتر يابن خالتي

أنت مالك بالفلول

دول ولاد حسني مبارك

يعني أولاد الأصول

يعني يعني مش جانيه

لما تطلع م العناية

ولا تطلع م الحقول

واللي خلف لسه عايش

مانت من حمورية أمك

روحت قلعته الغوايش

قام بعت لك التماسي

روحت باعت ورد بلدي

جنب مصنع الكراسي

قال ياحيحا

مصر عدت من فضيحة

قام فايت هالك جريحه

لمها تحت الشماسي

..........

ياسي عنتر يابن خالتي

أنت راجل أبن هبله

أنت عمرك كنت فارس

ولا اتجوزت عبلة

أنت فرطت في حسامك

وف علامك

وف عيالك

وف مدامك

لما أتحولت طبله

..........

ياسي عنتر يابن خالتي

عمري ماكان ليا خاله

خلفت عيل معرص

خلفت عيل زباله

طول لسانه مش كويس

عمره عاشق للسفالة

طب أنا حتبري منه

أيوه واختم بالحمامة

إن اننا مش راضي عنه

من هنا ليوم القيامة

أيه حيجرا لو جهاد

فتشت كل البلاد

بس مش لاقيه سلامه