أمي.....

الشاعر : عطية شواش

حد عارف أمي كانت

لابسه أيه وقت إما ماتت؟

لابسه طرحه لونها أخضر

جلابية لونها أخضر

سبحه فيها م الخضار

أمي كت طول النهار

قاعدة بتصلي النوافل

منه فيه

يامه طب بتصلي إيه؟!

كت تقول لي اسكت ياسافل

الأدان سامعه بودانك

وأنت قافل

كنت لسه يامه جاهل

هاتي خمسه جنيه يا حاجه

محتاجينها ف ماتش كوره

كنت بتلقي الشباشب

والأواني

بس كانت تديهالي

كت مديناني لوداني

لما جيت اكبر وأسدد

كل أقساطي اللي فاتت

أمي ماتت

صدقوني

اللي عنده أم عايشه

كل يوم يسأل عليها

أصل أنا محتاج دعاها

ينزل النور بين أيديها

تدهوني

ألحقوني

مش لاقيها