الاختيار ..

ياسر وهبه

مشهد الهجوم الإرهابي على الكمين بتاع " محمد إمام " ..

لو حد شايف أن ما حدث  شغل إخراج وأكشن .. أحب أن أوضح لكم إن هذا حصل عندنا بالفعل فى شمال سيناء لكن على 16 كمين وارتكاز أمنى فى يوم واحد وتوقيت واحد الساعة 7 صباحا 1 / 7 / 2015 تم استهداف كماين " السدرة " و " أبو رفاعى " و " سادوت " و " الماسورة " و " والى لافى " و " الوفاق " و " أبوطويلة " و " الضرائب " و " قسم شرطة الشيخ زويد " و " جرادة " و " الخروبة " و " قبر عمير " و " الإسعاف " و " البوابة " و " الشلاق " و " الوحشى " و " العبيدات " ..

وكانوا محددين هذا اليوم  لإعلان " ولاية سيناء " ورايحين بكاميرات ورايات داعش ومراسلين لقنوات تركيا و قطر ..

المشهد زى ما حضراتكم شوفتوا مجموعة إرهابية لكل كمين مكونة من عربيات الدفع الرباعى وأسلحة متعددة وقذائف هاون و RPG وسيارة مفخخة لكل كمين ..

بدأ الهجوم بتقدم سيارة دفع رباعى مصفحة مفخخة وبعد ما يتم تفجيرها ف الكمين يتم التعامل والاشتباك مع المصابين من قوة الكمين .. وكان أشهر الكماين دى كمين أبو رفاعى اللى قوته 17 مقاتل فدائى من خير أجناد الأرض رصدوا السيارة المفخخة وهى على بعد 400 متر طالعة من منطقة سكنية فى اتجاههم ..

 أطلقوا الطلقات التحذيرية الأول ف الجو استمرت العربية المفخخة ف التقدم فى اتجاه الكمين وعلى بعد 100 متر تم التعامل معاها مباشرة ولأنها مدرعة ما أثرش فيها إطلاق النار .. ف لحظة نط 2 مجندين " حسام جمال الدين " و " أحمد عبدالتواب " من فوق المدرعة بتاعتهم وجريوا فى اتجاه العربية المفخخة واحد قعد على مقدمة العربية المفخخة ودخل ماسورة البندقية من الفتحة اللى السواق بيشوف منها الطريق والمقاتل التانى ف جنب العربية بيضرب كل ذخيرته على العبوات المتفجرة اللى فيها وانفجرت قبل الكمين ب 50 متر واستشهد البطلين أعقبها إطلاق 14 دانة هاون على الكمين أستشهد مقاتل تالت .. وأصيب قائد الكمين ب4 شظايا كتم النزيف بحفنة رمل وكمل القتال زحف لصندوق القنابل ورمى 20 قنبلة يدوية ..

وصل الطيران الحربى ال F16 من الإسماعيلية والعناصر الإرهابية بتحاول الهروب بعد ما فشلوا ف احتلال الكماين ورفع راية داعش عليهم وتصوير المشهد ..

فضل ال F16 طاير فوق الموكب الإرهابي وما رضيش يضرب صاروخ واحد عليهم غير بعد خروجهم من المنطقة السكنية .. وفتح عليهم جهنم أول ما وصلوا الظهير الصحراوي وتفحم منهم 250 جثة بالكامل .