منسي الإنسان

أحمد ديدا

يونيه ٢٠١١ نازل أجارة من شغلي في السويس البلد الذى ل بكن له معزة خاصة في قلبي وبعد ما وصلت عند محطة رمسيس حبيت انزل أجيب شوية حاجات من الأزبكية أول ما وصلت و بجوار قسم شرطة الأزبكية لقيت سيدة عندها حوالي ٦٠ سنة بتبكي بسألها مالك يا حاجة ودار بينا الحوار ده:-

الست : ابني مجند لسه داخل الجيش حربية وجيت أشوف أي حد يتوسطله ينقله جنبي أنا معايا ٤ أولاد كلهم بعيد عني أتنين في السعودية وواحد شغال في أسوان وده الوحيد اللي جنبي ويساعدني في فرش الخضار بتاعنا.

أحمد ديدا : طيب يا ستي هاتي بياناته وبإذن الله هتتحل.

(في لحظة ومن غير تفكير واحد بس يلجئ ليه في الظروف دي.) بس هكلمه أزاي ده أنا ليا شهرين مكلمتهوش وأول ما اكلمه هكلمه عشان مصلحة... ما بين تردد وازاي استقبل رده فعله اللي واثق انه هتكون سيل من تهزيق بعشم من أخ كبير لآخوه الصغير قولت هتصل بيه واللي يجرا يجرا بقى.

أحمد ديدا : ابووو حمزة واحشني يا قائد

منسي : أيوه يا نصاب اضحك عليا بكلمتين يا مهزء فينك مش بتتصل

أحمد ديدا : والله مشاغل يا قائد وخصوصا إني في السويس وأنت عارف يادوب انزل اشتغل

منسي : الله يعينك يا حبيبي مش محتاج حاجه يالا قول

أحمد ديدا: مستورة يا قائد والله كتر ألف خيرك... بقولك يا قائد في موضوع حصل وعارف انك مش هتتاخر في الخير

منسي : قول يا سباق في أيه؟؟

أحمد ديدا : والله يا قائد معدي في الأزبكية لقيت ست بتعيط و حصل أن ظروف معاها (وحكيت له الظروف).

منسي : أديني بيانات العسكري أنا ليا واحد دفعتي في عجرود (منطقة تجنيد العسكري) هشوفه وبإذن الله خير طمنها

قفلت وفضلت واقف مع الست بالضبط عشر دقايق أديتها رقمي واخدت رقم حد جارهم عشان هي مش معاها موبايل ولو حصل جديد هبلغها وانا في بالي قولت ممكن قائد منسي يرن عليا بالليل مثلا ببص لقيته بيرن عليا.

منسي : يا سباق بلغ الست ان ابنها هيشتغل في كانتين الكتيبه وهينزل مبيت مشتريات ويبقى جنبها كل يوم.

في لحظة اترسمت على وشي ابتسامه تلقائية وأنا بسمع كلامه لقيت الست اللي كانت بتعيط وشها بقى بيضحك وطلبت تكلمه... استأذنته وافق على طول ووالله كم دعوات ماشفتهوش قبل كدا...