عبد الناصر ونكران الجميل

ناصر حجازي

بمناسبة موسم الهجوم على عبدالناصر هاحكي هذه الحكاية...

صلوا ع النبي....

في يوم من الأيام كنت في نقابة المحامين وفي حديقتها العامرة (الله يرحمها) وكان هناك محامى يطلق عليه زملاؤه لقب أبولهب، ولك أن تتخيل بذاءة أبولهب تبقى ازاى!!

المهم ابولهب دخل في وصلة سباب في عبدالناصر بلا سبب وكملها بأن أخرجه من الإسلام، المهم العبد لله جالس وبجوارى أحد المحامين كبار السن والمقام، أردت الرد على أبى لهب فأسكتني بوكزة في الكتف.. تحملتها وكتمت ألمها والغضب.

المهم انتهى ابو لهب من المعلقة الطويلة في سباب عبدالناصر وأراد الانصراف، لكن المحامي كبير السن والمقام أوقفه

*معلش يا أستاذ فلان هو حضرتك خريج حقوق أيه؟

-حقوق أسيوط

*سيبك من أن كلية حقوق أسيوط وكمان الجامعة كلها عملها عبدالناصر ولولاه مكنش حضرتك دخلت الكلية ويمكن مكنتش أتعلمت من اساسه..

سؤال تاني يا أستاذ هو حضرتك عندكم أرض في البلد؟

_ ايون يا أستاذ فلان حضرتك بلدياتي وعارف أن عندنا أرض..

*عندكم كام فدان؟

- بعد تلجلج .. عندنا كذا فدان

*ايوة اللى أخدهم الوالد من الإصلاح الزراعي!!

- أبوة هو عبدالناصر أداهم لابويا من بيت أبوه؟؟!

*طبعا لا يا أستاذ بس حضرتك تعرف أن عبدالناصر أداهم لأبوك من بيت أبويا انا وتعرف ان ارض الإصلاح اللى في بلدنا كلها كانت ملك جدي وأخواته وعبدالناصر أخدها منهم عشان يديها لأبوك فتحلك مدرسة ابتدائي واعدادى وثانوي في البلد وعملك جامعة أسيوط عشان تبقى محامي تحط كتفك في كتف أولاد الباشوات ... وفي الآخر تشتم عبدالناصر

- صمت طوييييييييل

*كان وراك معاد يا أستاذ فلان ياريت تلحقه

** ملحوظة أطراف هذه القصة لا زالوا على قيد الحياة وشهودها كذلك باستثناء العزيز إبراهيم فكرى رحمه الله