مش قادر أفهم محمد منير

 

 

 

يعني يقعد يدينا دروس في الوطنيه وحب الوطن ..

 

وبعدين يقولك أصل الفنان مالوش وطن ، ولو فكرت أروح إسرائيل يبقي لازم أروح غزه وأروح المناطق الفلسطينية، وإنه بيدرس إنه يروح الحفلة اللي معروض عليه في فلسطين المحتلة !!!!!

 

يعني في النهاية و(م الآخر) ذي مابيقولوا .. ماعندوش مانع ياخد الختم الإسرائيلي علي باسبوره ..

 

أنا شخصياً بالنسبالي فيه أتنين محمد منير ..

 

منير اللي بدأ مع كلمات عبد الرحيم منصور ومجدي نجيب والأبنودي وحجاب وسيد حجاب واحمد فؤاد نجم ، وزاد عليهم لما غني لأبوهم الشرعي فؤاد حداد وعمهم صلاح جاهين .

 

، علي إيقاعات موسيقي احمد منيب وبليغ حمدي وكمال الطويل ووجيه عزيز وغيرهم بصحبة يحيي خليل صاحب الفضل الكبير عليه ..

 

ومحمد منير التاني اللي طلع علينا من أكتر من عشر سنين بيجري ويفكر في تراك تاني غير تراك محمد منير الأولاني .

 

من حق محمد منير يغير أفكاره عن الدنيا والمزيكا ومصر والعالم، وتنساه دراعه اليمين وتنساه دراعه الشمال وتنساه عنيه القديمة ويشوف بعنيه الجديدة اللي مش شايفه إن حفلته في إسرائيل تطبيع ثقافي وشعبي وإن ده مش لصالح فلسطين ولا(القدس) ولا(العمارة الفلسطينيين) اللي غنالهم ..

 

ومن حقنا كمان نغير أفكارنا عن محمد منير ، ومانحطش قداسه وجدانيه عليه لمجرد أنه محمد منير اللي عرفناه من أول ما اصدر ألبوم شبابيك وعشنا معاه وصدقنا إبداعاته الجميلة اللي قدمها لغاية نص الألفية التالته ..

 

أنا مضطر اعتبره انتهي من عشر سنين علي الأقل ..

 

وباتمني علي محمد منير الجديد اللي ابتدي بعد كده أنه يسمع كلام بيرم التونسي القديم اللي بيقول فيه :

 

يااهل المغني

 

دماغنا وجعنا

سكوت

لله

____________

 

حمدى عبد العزيز

17 مارس 2021